Кривична пријава за дебранец, узурпирал државно земјиште на брегот на Дебарско Езеро

Дебарското Одделение за внатрешни работи поднесе кривична пријава против жител на Дебар за узурпација на земјиште во државна сопственост и бесправна градба.

– Кривична пријава е поднесена против Г.Ц.((56) од Дебар, поради постоење основи на сомнение за сторени кривични дела „узурпација на недвижности“ и „бесправно градење“. Тој, кај месноста „Шпилје“ на брегот на Дебарско Езеро, неовластено заземал парцела во државна сопственост со површина од 440 квадратни и без соодветна документација за градба, изградил објект од цврста градба, информира Стефан Димоски портпарол на Секторот за внатрешни работи-Охрид.

Со тоа, додава, тој постапил спротивно на одредбите од Законот за градење и се стекнал со противправна имотна корист во износ од околу 871.992 денари.

Ова не е прв случај на узурпација на земјиште покрај брегот на езерото, кое главно е во државна сопственост, на што во неколку наврати предупредуваа и дел од членовите на Советот на општина Дебар, според кои дел веќе се легализирани.

Земјиште во државна сопственост се узурпира кај градската плажа, месноста Шпилје, како и кај еден од најубавите делови каде има засадени борови дрвја, кои ги уништуваат.

Исто така, се узурпира и земјиште кај месноста Манастирец, попозната како „три чешми“ на патниот правец Дебар-Струга, на брегот на Дебарско Езеро, кое во најголем дел е во сопственост на МПЦ-ОА, односно Бигорскиот манастир.