„Центар и пријателите“ – почна предновогодишната забава на „Боемска 1“ во Дебар Маало

Започна предновогодишната забава на улицата „Боемска 1“ во Дебар Маало, информираат од општина Центар.

Оттаму објаснуваат дека станува збор за дводневни настани за децата и возрасните кои ги организираат Општина Центар заедно со општествено одговорните компании.

-Улицата „Боемска 1“, ечи денеска од детските радости, песни и музички настапи, градоначалникот Горан Герасимовски на дечињата им ја честита новата година и им посака многу здравје, среќа и успеси. На бината ги покани и Дедо Мраз и Спајдермен кои им поделија пакетчиња на присутните дечиња, известуваат од општината.

Градоначалникот Герасимовски изразил огромно задоволство што со пријателите и донаторски компании успеале да го организираат овој настан.

-Има пресреќни дечиња, родители, баби и дедовци и навистина од нивните лица се гледа дека ова недостасуваше. Имавме турбулентна и кризна година да ја испратиме со песна, а новата 2023 да ја дочекаме со насмевки, позитивна атмосфера и нови очекувања, изјави Герасимовски.

Од општина Центар соопштуваат дека предновогодишната забава која денеска се одржува на „Боемска 1“ е со детска програма во која учество земаат дечиња од сите градинки во општината, ученици од сите осум основни училишта и деца од хорот и балетската група на Детскиот културен центар Карпош.

-Додека за утре се најавени настапите на Дац и Александар Митевски, Драган Б. Костиќ, Фиц од „Студени нозе“ и Тамбураши. Денеска покрај поделените пакетчиња на присутните деца, пакетчиња беа поделени и во детските градинки во Општина Центар, информираат од локалната самоуправа.