Мицкоски: Идната влада на ВМРО-ДПМНЕ планира да испорача 11,5 милиони евра годишно за проекти во општина Аеродром

Добар ден и од мене, чест и задоволство е да се биде дел од овој спектакуларен настан, би рекол, зошто, затоa што така го доживуваат мештаните кој што долги години биле манипулирани, лажани од страна на многумина кои што доаѓале овдека, ветувале, си оделе и ништо не правеле.

Ние тука бевме на почетокот од градежните активности, сега сме еве на самиот крај, кога можеме заедно со градоначалникот, со советниците, да навистина бидеме сведоци на еден капитален објект кој што на задоволство на многумина жители во овој дел на општина Аеродром ќе биде место каде што ќе може да другаруваат, да спортуваат, да разговараат, нешто што досега го немале или оделе на други места на територијата на општина Аеродром или надвор од територијата на општина Аеродром. Затоа уште еднашка сакам да се заблагодарам и на градоначалникот и на советниците, претседатвачот на Советот што и покрај ограничените услови во коишто работат овие би рекол две години и покрај сите опструкции од страна на владата на ДУИ и СДСМ тие сепак наоѓаат начин како проектите кои што беа ветени во 2021 година да бидат реализирани.

Јас само ги охрабрувам само така да продолжат, исто така улогата и на пратеникот којшто доаѓа од општина Аеродром, кој што во рамките на Парламентот при секој буџет доставува амандмани, амандмани кои што за жал повторно ќе кажам поради игнорантскиот однос на оваа влада на СДСМ и ДУИ никогаш не биле до сега усвојувани. Но, добра вест е што за неколку месеци од денеска ќе имаме нова влада, влада на ВМРО-ДПМНЕ која што за разлика можеби од тоа што се случувало во изминатите во повеќе 3 децении има намера да води конзервативна кампања односно не сакаме да ветуваме премногу, да ветуваме чуда бидејќи никој денеска не е чудотворец. Сакаме тоа што ќе го ветиме и да го испорачаме бидејќи во минатото имало многу ветувања, тие ветувања предизвикуваат големи очекувања, а потоа кога тие очекувања нема да се испорачаат тогаш има и големи разочарувања, а како резултат на тие разочарувања денеска имаме и многумина наши сограѓани кои што за жал се селат од Македонија и од ден на ден Македонија станува се попразна и се попуста, а држава без народ полека престанува и гасне и престанува да биде држава.

Затоа ние сакаме да влеземе во кампања во која што тоа што ќе го ветиме и ќе го испорачаме. Носечки проект на идната влада на ВМРО-ДПМНЕ ќе бидат проекти, капитални за потребите на граѓаните директно во општините низ Македонија. И не како што тоа го прави оваа влада која што ги блокира општинските обврзници, како што кажа и Тимчо, за капитални проекти, за капитални инвестиции, две градинки, доградба на две училишта и така натаму, ние планираме да бидеме влада која што ќе биде влада на целата територија во Македонија, за сите граѓани, за сите општини без разлика дали тоа се од ВМРО-ДПМНЕ, СДСМ, ДУИ, Алијанса на Албанците, БЕСА или се независни градоначалници. Планираме да бидеме влада која што ќе испорача до 250 милиони евра годишно директно од буџетот во општини капитални проекти. Овде за општина Аеродром се предвидени околу 11,5 милиони евра годишно или тоа е некаде до 46 милиони евра за еден четиригодишен мандат. Цениме дека на тој начин сите оние потреби на аеродромци, не само во форма на оваков тип на објекти, спортски игралишта, детски игралишта и така натаму, туку и ова кое што и денеска се блокира, а тоа се овие две градинки кои што се потребни, доградбата на овие две училишта, едно средно училишта, плоштадот позади Капитол и уште многу други проекти кои што се дел од овој проект ќе бидат испорачани, ќе бидат реализирани и цениме дека на тој начин ќе го подобриме квалитетот на живот на нашите сограѓани и дека на тој начин барем една од причините која што сега ја наведуваат нашите сограѓани зошто ја напуштаат Македонија ќе биде елиминирана односно ќе имаат навистина пристојни европски услови за живот.

Така што уште еднаш ќе ми дозволите да честитам и на Тимчо, на советниците, на луѓето кои што се дел од администрацијата во општина Аеродром, кои што придонесоа денеска да сведочиме на еден ваков прекрасен објект и да посакам нормално многу дечиња овдека да другаруваат, спортуваат и да го поминуваат денот.