Стипендии за учениците и студентите од Општина Охрид

Општина Охрид ги објави конкурсите за доделување стипендии за учениците од основните и средните училишта, како и стипендии за студентите од градот и околината.

Според објавените конкурси, Општината ќе доделува стипендии на ученици кои се запишани во основните општински училишта за девет месеци во текот на една учебна година, а износот изнесува два илјади денари месечно. Стипендиите се доделуваат во три категории: за талентирани ученици (од четврто до деветто одделение), за ученици кои живеат во потешки социјални услови (од шесто до деветто одделение) и за посебни остварувања на ученици од прво до деветто одделение и истите се неповратни.

Стипендии на ученици од средни училишта од по две илјади денари ќе бидат доделени за талентирани ученици, за ученици кои живеат во потешки социјални услови и за посебни остварувања на ученици.

Општина Охрид доделува и стипендии на редовни студенти од Општина Охрид запишани на додипломски студии во прва година на државните универзитети во Република Северна Македонија и на државни универзитети во други земји за академската 2023/2024 година кои живеат во потешки социјални услови. Стипендиите се доделуваат за девет месеци во текот на една академска година, а износот на стипендијата изнесува три илјади денари месечно. Стипендиите се доделуваат во две категории: за редовни студенти од Општина Охрид запишани на додипломски студии во прва година на државните универзитети во Република Северна Македонија за академската 2023/2024 кои живеат во потешки социјални услови и за редовни студенти од Општина Охрид запишани на додипломски студии во прва година на државни универзитети во други земји за академската 2023/2024 година кои живеат во потешки социјални услови.

Условите за распишаните конкурси можат да се најдат на општинската интернет-страница.