Седници на Извршниот и Централниот комитет на ВМРО-ДПМНЕ, партијата ќе одлучува за имињата на техничките министри
ВМРО-ДПМНЕ денеска ќе одржи седници на Извршниот и на Централниот комитет. Засега нема официјална најава за тоа дали од овие седници ќе произлезат заклучоци за тоа кој ќе бидат министрите и дополнителните заменици министри од партијата во техничката влада која треба да се формира најдоцна на 28 јануари.
Лидерот на партијата Христијан Мицкоски по литургијата на Божик, најави дека на 11 јануари на седници на овие тела на партијата ќе се разговара за имињата на кандидатите за министри и заменици-министри за техничката влада, но не кажа дали тие вечерва ќе бидат соопштени. Во изјава претходно, Мицкоски рече дека имињата на министрите ВМРО-ДПМНЕ ќе ги соопшти после Водици.
Извесно е дека ВМРО-ДПМНЕ ќе биде дел од техничката Влада, но Мицкоски ќе им предложи на сопартијците да донесат одлука во Собранието пратениците да се воздржат од гласање за Талат Џафери за премиер на преодната Влада.
Најавената средба меѓу премиерот и претседател на СДСМ Димитар Ковачевски и Мицкоски се уште не е реализирана, барем за јавноста, а последните информации беа дека партиите комунициираат на ниво на потпретседатели.
Вчера премиерот Ковачевски рече дека ќе има средба, но не кажа кога.
И тој и Мицкоски, според најавите се очекува денеска да имаат јавни настани на кои се очекува да соопштат дали нешто се променило во однос на техничката влада.
СДСМ веќе ги соопшти нивните министри и дополнителни министри во техничката влада, се знае и дека премиер ќе биде претседателот на Собранието Талат Џафери и дека на негово место ќе биде Јован Митрески.
Формалната постапка за подготовка и формирање на техничката влада, според соопштението од последната координативна средба кај Џафери, е најавен за 22 јануари, а треба да финишира со изборот на преодната Влада на 28 јануари. Оваа Влада според нашето законодавство се формира сто дена пред изборите, а мандатот и истекува со формирањето на новата Влада, некаде до средината на јули.
Парламентарните избори ќе бидат закажани за 8 мај, а две недели претходно ќе се одржат претседателските избори. Партиите се уште ги немаат соопштено претседателските кандидати, наведувајќи дека се уште се прават анализи и се предлагаат кандидати од базата.
