Околу 120 учесници на Водици во Прилеп

За Богојавление, Водици, се пријавија 120 прилепчани кои ќе скокнат во водата на базенот кај прилепскиот хотел „Салида“ за да фатат светиот крст од осветената вода. Свечениот чин ќе биде напладне в петок, на Водици.

Во соработка со Прилепското архиерејско намесништво оваа година се враќа масовноста на овој свет чин, информираат од прилепската локална самоуправа каде беше пријавувањето на учесниците и која во соработка со Прилепското архиерејско намесништво го организира светиот чин на Водици.

Чинот на фрлање на крстот, Богојавленскиот водосвет, ќе биде извршен и во уште 15 други населени места на територијата на општина Прилеп каде ќе учествуваат околу 150 жители - верници од населените места.

Во Прилепско четврта година по ред ќе се одржи и една традиција на капење во осветени води. Повеќе од 100 прилепчани чинот ќе го изведат на Водици на езерцето во близина на превојот Плетвар.