Иван Миленковски го фати светиот крст во водите на Каменичка Река

Деветнаесетгодишниот Иван Миленковски од Македонска Каменица го фати светиот крст положен во водите на Каменичка Река на денешниот голем христијански празник Богојавление-Водици.

По светиот крст во Македонска Каменица, како што се вели во објавата на градоначалникот на Македонска Каменица, Димчо Атанасовски, скокнале околу 30 верници.

-Му врачив пригодни подароци и му посакав годинава да биде исполнета со многу успеси, среќа и благосостојба за сите жители во општината, рече Атанасовски.

Светиот крст во водите на Каменичка река годинава го положи епископот Делчевско – каменички г. Марко по претходно отслужена утринска богослужба и Богојавленски водосвет во Светиот храм „Успение на Пресвета Богородица“.