Амбасадорот на Австрија во земјава во посета на Крива Паланка

Делегација предводена од амбасадорот на Австрија во државава, Мартин Памер, денеска беше во официјална посета на општина Крива Паланка. Иницијативата за воспоставување соработка беше на територијалната противпожарна единица од општината и командирот Иле Коцевски.

- Меѓународна соработка на Општина Крива Паланка со нашите европски пријатели, гости на градоначалникот и општината денеска - амбасадорот на Австрија во Северна Македонија, Мартин Памер и делегацијата, Петер Логар, службеник за бегалци и кризни ситуации на Тирол и Јоханес Пап, заменик-командант на Покраинската противпожарна тиролска бригада. На средбата се дискутираше за области за можна идна соработка, покрај првичната, иницијална за посетата - противпожарна заштита. При посетата на ТППЕ Крива Паланка, командирот Иле Коцевски и припадниците на единицата, ги запознаа со техничката опременост, капацитети и ресурси, разменија искуства и се разговараше за можни проекти за поддршка и развој, информираше Службата за комуникација со јавност на локалната самоуправа.

Локален економски развој, образование, култура, спорт, се само дел од темите за што се разговарало со општинските служби и градоначалникот. Дел од делегацијата посетил воспитно-образовни институции од градот, ЛУ Градски музеј Крива Паланка и манастирот „Свети Јоаким Осоговски“.

- Општина Крива Паланка продолжува да гради меѓународна соработка и партнерства, нагласија од општината.