Ѓуриќ: Започнуваме глобална дипломатска кампања за зачувување на основните права на Србите на Косово

„Ние не се откажуваме од Косово и Метохија и ќе го зајакнеме и институционално и економски. Започнуваме глобална дипломатска кампања за зачувување на дијалогот и основните права на Србите на Косово и Метохија“, изјави министерот за надворешни работи Марко Ѓуриќ, јави дописникот на МИА од Белград.

-Не се откажуваме од Косово и Метохија и ќе го зајакнеме и институционално и економски. Веќе денеска ќе разговарам со амбасадорите на земјите од Квинта, започнуваме глобална дипломатска кампања за зачувување на елементарните права на Србите на Косово и Метохија. Одиме на есенската сесија на Генералното собрание на ОН, ќе се растрчаме низ целиот свет, изјави Ѓуриќ за РТС.

Тој додаде дека мерките што ги претстави претседателот на Србија, Александар Вучиќ, претставуваат почеток на нова ера во борбата за правата на Србите на Косово и опстанок на дијалогот.

-Мерките што се усвоени претставуваат најсеопфатен пакет мерки донесен од 1999 година. Навикнати сме на неприфатливи вести од Косово и Метохија кога станува збор за позицијата на Србите. Само седум пати Србите се ранети од полицајците на Курти, укинуваат институции, платежни трансакции и исплата на плати и пензии, основни услови за живот, рече Ѓуриќ и потсети дека 86 Срби се вонсудски затворени, а многумина се држат како политички затвореници.

Како што рече српскиот министер за надворешни работи, во претходните речиси две години режимот на Албин Курти целосно го елиминирал дијалогот како метод за одржување на состојбата на терен барем на нормално ниво.

Затоа министерот Ѓуриќ смета дека мерките што ги претстави претседателот на Србија ќе имаат далекусежни последици и дека ова е конечно важна и добра вест за Србите.

-Тоа значи дека државата Србија преку закони ќе застане на страната на Србите во Косово. Не сакаме да ги менуваме локалните и меѓународните правни институции, но овие мерки ќе ги пополнат сите тие дупки што ги користеа оние кои ги прекршија основните човекови права. За таа цел ќе се формира специјално обвинителство и судски совети. Не може неказнето да се прекршуваат човековите права, српскиот имот е узурпиран, нагласи Ѓуриќ.

Министерот за надворешни работи во интервјуто за РТС најави дека денеска ќе се одржи посебна седница на Владата за Косово, свикана од премиерот Милош Вучевиќ, со што сите министерства ќе добијат точни упатства за мерките, и помошта да стигне до Косово што е можно поскоро.