Започна НБА претсезоната во Абу Даби: Бостон подобар од Денвер

Во Абу Даби официјално започнаа подготвителните натпревари за претстојната сезона со дуелот на двајцата претходни освојувачи на трофејот Лери О'Брајан.

Актуелниот шампион, Бостон Селтикс го победи Денвер Нагетс со 107:103.

Пред 18.000 гледачи во „Етихад арената“ се одигра релативно конкурентен натпревар во кој тренерите Џо Мазула и Мајк Мелоун ја ограничија минутажата на нивните главни ѕвезди.

Дуелот го следеа бројни НБА легенди како Кевин Гарнет, Магзи Богс, Мич Ричмонд, како и фудбалски великани како Роналдињо и Тиери Анри.

За прв пат можевме да ги видиме новите засилувања во дресот на тимот од Колорадо - Расел Вестбрук и Дарио Шариќ.

Кај Денвер се истакнаа Никола Јокиќ со 14 поени (5/7 од поле), 8 скока и по 2 украдени топки и асистенции, Мајкл Портер Јуниор (12 поени), Расел Вестбрук (12 поени, 3/10 од поле, 4 скока, 8 асистенции) и Џулијан Стротер (11 поени).

Пејтон Причард блескаше во зелениот дрес, особено во првото полувреме. На крајот беше најефикасен на теренот со 21 поен (6/13 од поле, 6/12 тројки) и 6 асистенции, додека Џејсон Тејтум постигна 12 поени.

Ова е трета година по ред како во „Етихад арената“ во Абу Даби се организира подготвителниот турнир за НБА тимовите