Мицотакис: Турција инсистира на своите позиции, а ние на нашите

Турција инсистира на своите позиции, а ние на нашите, вели грчкиот премиер Кирјакос Мицотакис во интервјуто за телевизијата „Алфа“ и објаснува дека од моментот кога Турција сака да разговара за други работи за кои Грција не сака да бидат ставени на маса, значи дека „не е постигнат значителен напредок“, јави дописничката на МИА од Атина.

Грчкиот премиер уште еднаш ја истакнува волјата и намерата на Грција да продолжи дијалогот до Турција, но и дека ќе продолжат да се стремат кон „мирни води“ со соседната земја.

-Можеме да се согласиме и дека не се согласуваме. Ова можеби е и најверојатното сценарио во моментов. Ова не значи дека треба постојано да бидеме во состојба на тензија, да не разговараме за други аспекти од нашите односи и постојано да бидеме „со прстот на чкрапалото“ и да се плашиме од инцидент. Мислам дека Грците не го сакаат тоа, истакна Мицотакис.

Во однос на мигрантското прашање рече дека е континуиран проблем за Европа, но и посочи дека се обидуваат да соработуваат со Турција за чамците кои поаѓаат од турското крајбрежје.