Тајван соопшти дека Кина испратила бродови во нејзините води пред воените вежби

Тајван денеска соопшти дека Кина испратила свои бродови во неговите води пред големите воени вежби како одговор на неодамнешната посета на тајванскиот претседател Лаи Чинг-те на Хаваи и Гуам.

Тајванското Министерство за одбрана соопшти дека забележало како бродови на кинеската морнарица и крајбрежна стража влегуваат во Тајванскиот теснец и во западниот дел на Тихиот Океан и дека Кина до задутре го ограничила воздушниот простор долж нејзиниот југоисточен брег.

Потврда за овие потези немаше од кинеска страна.

Во тајванското соопштение се наведува дека е формиран центар за реагирање при вонредни случаи и започнати се вежби за проверка на борбената готовност. Не е прецизирано што подразбираат овие вежби.

Тајванскиот претседател Лаи Чинг-те ги посети Хаваите и Гуам за време на еднонеделната турнеја низ Пацификот што заврши во петокот. Кина тврди дека Тајван е негова провинција која не треба да има свој претседател или да извршува дипломатски работи и се противи на американската поддршка и продажбата на оружје на Тајван.