Британија ги забрани блокаторите на пубертет за сите помлади од 18 години
Блокаторите на пубертет за помлади од 18 години со родова дисфорија ќе бидат забранети на неодредено време ширум Велика Британија, освен за употреба во клинички испитувања, соопшти владата.
Министерот за здравство Вес Стритинг потврди по консултација со медицински експерти дека постоечките итни мерки со кои се забранува продажба и снабдување со блокатори за пубертет ќе бидат продолжени на неодредено време.
Министерството за здравство и социјална заштита соопшти дека Комисијата за лекови објавила независен стручен совет дека „во моментов постои неприфатлив безбедносен ризик при континуираното препишување на блокатори на пубертетот на децата“.
Стритинг истакна дека комисијата препорачала неопределени ограничувања за да се осигура безбедноста на децата и младите.
Националната здравствена служба на Англија (NHS) уште во март годинава објави дека на децата повеќе нема да им се препишуваат блокатори на пубертетот во клиниките за родов идентитет, а конзервативната влада во тоа време порача дека ќе помогне да се обезбеди грижа заснована на докази и во најдобар интерес на детето.
Хормоните кои го потиснуваат пубертетот делуваат така што го потиснуваат ослободувањето на хормони кои предизвикуваат пубертет и често се препишуваат на деца кои се сомневаат во својот пол. Блокаторите на пубертетот на тој начин ги запираат физичките промени како што се развојот на гради или влакна на лицето.
Докторката Хилари Кас, која напиша преглед за грижа за полот на децата и го објави својот конечен извештај во април, ги опиша блокаторите на пубертетот како „силни лекови со недокажани придобивки и значителни ризици“.
- Затоа препорачав тие да се препишуваат само по мултидисциплинарна проценка и во рамките на истражувачки протокол. Ја поддржувам одлуката на Владата да продолжи со ограничувањата за издавање блокатори на пубертетот за родова дисфорија, истакна таа
