Џефри ван Орден: ЕУ мора да биде храбра во односот кон Западен Балкан и да го препознае како регион од стратешко значење

Европската унија мора да биде храбра во односот кон Западен Балкан и да го препознае како регион од стратешко значење. Ова во интервју за БТА го изјави поранешниот известувач на Европскиот парламент за напредокот на Бугарија на европскиот пат, Џефри ван Орден.

Тој истакна дека важно прашање на патот кон членството во ЕУ на Албанија, Босна и Херцеговина, Косово, Црна Гора, Северна Македонија и Србија е дали е политички неопходно тие да се приклучат како полноправни членки на „западниот клуб“.

А под западен клуб, додаде тој, мислам на Европската унија и НАТО.

„Мислам дека треба само да ја погледнете мапата и другите влијанија во овој регион - Русија повторно се активира, па и Кина, дури и Иран е активен во регионот. Што треба да се направи за да се смени ставот и овие земји да почувствуваат дека цврсто се движат по патот на демократијата и евроатлантските интеграции. Ми се чини дека на овие земји им е потребно уверување дека се во клубот. Ова беше мојот аргумент за Бугарија пред 17 и повеќе години. Ова е аргументот што и денес би го презентирал. Знам дека некои гласови тврдат дека сите структури мора да бидат во ред, сите демократски парчиња мора да се стават во ред“, истакна поранешниот известувач за Бугарија.

„Вакви проблеми има во секоја земја. Ако постапевме вака, никогаш немаше да има сојузи. Затоа мислам дека треба да бидеме храбри во односот кон Западен Балкан и да го препознаеме како регион од стратешко значење“, нагласи Ван Орден.

Тој го коментираше и прашањето дали сите земји од Западен Балкан треба да бидат прифатени заедно или во зависност од тоа кога се подготвени да влезат во ЕУ. Според него, ова прашање било актуелно и во 2003 година, кога било одлучено одреден број земји да влезат во ЕУ, а две да останат за подоцна - Бугарија и Романија.

Ван Орден истакна дека некои од земјите од Западен Балкан се поголеми, имаат поголеми економии, некои се многу чувствителни на руски притисок и мешање и тоа треба да се земе предвид. Тој додаде дека влезот во Европската унија се уште е политичка одлука.

„Знам дека има економски, политички, демократски и други пречки кои мора да ги надминат земјите кандидати за членство во ЕУ, но на крајот на денот ова е политичка одлука. Тоа го видовме во 2007 година кога Бугарија и Романија се приклучија на ЕУ. Ниту една од страните тогаш не беше 100 отсто подготвена, но беше донесена политичка одлука. Како во 2004 година, кога голема група земји се приклучија на ЕУ“, потенцира Ван Орден.

Минатата година претседателот на Европскиот совет, Шарл Мишел изјави дека до 2030 година ЕУ ќе биде подготвена за прием на земјите од регионот.

Сепак, Ван Орден потсети дека ситуацијата во Европа, па дури и на глобално ниво во 2030 година отсега не може целосно да се предвиди