Рекорден број жени заземаат раководни позиции во најголемите германски компании

Процентот на жени во највисокото раководство во најголемите германски берзански компании достигна рекордно високо ниво, пренесе ДПА.

За прв пат, повеќе од една четвртина (25,7 отсто) од членовите на одборите во првите 40 DAX компании се жени, покажува анализата на организацијата Жени во надзорни одбори (Фидар), која и била доставена на ДПА.

Ова е малку повисоко отколку во претходната студија во јануари (23,5 отсто) и рекорд откако Фидар почна да го објавува својот индекс во 2011 година.

Повеќе жени се приклучуваат и на надзорните одбори, со DAX квотата од 39,7 проценти, нешто повеќе од еден процентен поен повеќе отколку во јануари.

Германија има двојна структура на одбори во големите компании, при што одборот на директори го надгледува компанијата, а надзорниот одбор го надгледува одборот на директори.

- Со одборите на DAX 40 гледаме што можат да постигнат обврзувачките прописи за еднакво учество, рече основачката претседателка на Фидар, Моника Шулц-Стрелоу. Таа додаде дека во текот на изминатите 10 години, DAX компаниите повеќе од тројно го зголемиле процентот на жени во нивните одбори, „и тоа и покрај сите изразени сомнежи дека нема доволно квалификувани жени за да ги пополнат потребните позиции“.