Стармер по виртуелниот самит – „Сега топката е кај Путин“
Британскиот премиер Кир Стармер ја повтори поддршката за Украина по завршувањето на виртуелниот самит на „коалицијата на подготвени“, која обединува земји што ја поддржуваат Киев.
„Нашата посветеност кон Украина останува непоколеблива, и сега и во иднина“, изјави Стармер во соопштението на Даунинг стрит.
Тој ги поздрави напорите на американскиот и украинскиот претседател, Доналд Трамп и Володимир Зеленски, за постигнување мировен договор во Џеда, како и подготвеноста на Украина да прифати 30-дневен прекин на огнот доколку Русија се согласи.
„Сега топката е во рускиот двор. Претседателот (Владимир) Путин треба да покаже дека е сериозен за мирот“, се наведува во писмената изјава на Стармер, во која додава дека руското одложување и продолжувањето на нападите врз Украина се спротивни на изјавите на Кремљ за желба за мир.
„Ја потврдивме нашата посветеност на долгорочната безбедност на Украина и се согласивме дека Украина мора да биде способна да се одбрани и да ја одврати идната руска агресија. Цврстите и веродостојни безбедносни аранжмани се најдобриот начин да се осигура дека секој договор завршува со траен мир. Се договоривме дека воените планери ќе се состанат повторно во Обединетото Кралство оваа недела за да ги унапредат практичните планови за тоа како нашите војски можат да ја поддржат идната безбедност на Украина. Ќе изградиме сопствена одбрана и вооружени сили на Украина и ќе бидеме подготвени да се распоредиме како „коалиција на подготвени“ во случај на мировен договор, за да помогнеме во обезбедувањето на Украина на копно, на море и во воздух“, се посочува во пишаната изјава по состанокот.
„Во случај на прекин на огнот, ја нагласивме потребата од цврсти аранжмани за следење за да се осигураме дека сите прекршувања на договорот се идентификувани и истакнати. Се согласивме дека во случај претседателот Путин да одбие да се согласи на итен и безусловен прекин на огнот, мораме да ги зголемиме нашите напори за зајакнување на Украина, да ја ослабиме руската воена машина и да го зголемиме притисокот врз претседателот Путин да го убедиме да дојде на преговарачка маса. За да го постигнеме ова, ќе ја забрзаме нашата воена поддршка, ќе ги заостриме нашите санкции за руските приходи и ќе продолжиме да ги истражуваме сите правни патишта за да се осигураме дека Русија ќе ја плати штетата што и ја нанесе на Украина. Се договоривме да ги продолжиме овие разговори како група во наредните денови за да обезбедиме праведен и траен мир во Украина“, посочува британскиот премиер.
