Прваците од „Прва ЛЕГО-лига на Македонија 2025“ одат на Светското првенство во јуни
Во „Дајмонд мол“ во Скопје, се одржа државниот натпревар во роботика и инженерство, „Прва ЛЕГО-лига на Македонија 2025“ ('FIRST LEGO League Macedonia 2025'). На него учествуваа 23 тима, со над 230 ученици и нивните ментори, од 15 државни училишта од цела држава.
Тимот „НООБС“ ('New Original Operational Best Students - The NOOBS') од специјализираното инженерско училиште „Young Engineers - Skopje Macedonia“ („Млади инженери - Скопје Македонија“) е апсолутен победник на националниот натпревар. Прваците со симболично име „Нови оригинално-оперативни најдобри ученици“, освојувајќи го првото место, обезбедија директен пласман на светската „Прва ЛЕГО-лига“ - првенство коешто ќе се одржи од 24. - 28 јуни во САД.
Екипата на „НООБС“ ја сочинуваат: Бисера Стојановска, Петар Копачев, Синиша Шиповиќ, Ален Атанасов, Бодан Николов, Иван Скалов, Ведран Анастасовски, Тео Ваљак Трпчевски и Ноа Петковски.
„Во ‘Young Engineers - Skopje Macedonia’, веруваме дека секое дете има потенцијал да биде иноватор. Преку СТЕМ едукација, тие не само што учат, туку градат самодоверба, љубопитност и визија. Нашите ученици не го следат светот - тие го создаваат!“, се вели во соопштението на тимот-шампион.
Прва ЛЕГО-лига, Македонија, натпревар
Тимовите во „ЛЕГО-лигата“ се оценуваат според четири главни категории: 1. Роботска игра и извршување мисии со ЛЕГО-робот во ограничено време; 2. Роботски дизајн - инженерска иновативност, функционалност и ефикасност; 3. Иновативен проект - развој на решение за глобален предизвик; 4. Основни вредности - тимска работа, инклузивност, соработка и ентузијазам.
Највисоко рангираните тимови се селектираат за интернационални натпревари, а шампиони стануваат тимовите со најдобрите резултати во сите категории.
Во програмите на „Млади инженери“ (Young Engineers) учествуваат ученици на возраст од 5 до 16 години, поделени во две категории: 5 - 9 години и 10 - 16 години.
