Шара: Во Сирија нема секогаш да биде можен консензус

Привремениот претседател на Сирија, Ахмед ал Шара денеска изјави дека одлуките за обновата на земјата ќе се носат со консензус, но оти нема да може да им угоди на сите.

За секоја мерка што ќе ја преземеме, нема секогаш да има договор, што е нормално, но мораме да постигнеме консензус колку што е можно повеќе, наведе Шара.

Две недели по уставната декларација, со која Шара има овластувања во законодавната, извршната и судската сфера, вчера е формирана привремена влада, која нема премиер, туку генерален секретар и 23 министри. Четворица министри се припадници на сириските малцинства – христијанин, Друз, Курд и алевит, но ниту еден нема клучен ресор. Најголемиот број министри се сунити.

Во преодната влада, министерот за надворешни работи Асад ал Шибани и министерот за одбрана Мурхаф Абу Касара ги задржаа функциите, додека за министер за внатрешни работи именуван е Анас Хатаб, кој претходно беше директор на разузнавачката служба.

Западните земји и Обединети нации побараа од привремената сириска влада да ги почитува човековите права и во структурите на власта да ги вклучи сите етнички заедници.