„Тетово сака парк“: Наместо зеленило, во Тетово ќе се гради комплекс со 2.000 станови

Иницијативата „Тетово сака парк" која предлагаше формирање парковска површина во делот од просторот на поранешниот „Монопол“со измена на Генералниот и Деталниот урбанистички план за намената Д - паркови и зеленило, алармира дека сега Општината ја прави измената, но место за индустрија го предвидува за изградба на станови.

-Општината тогаш немаше слух, немаше волја и даваше разноразни контрадикторни и неосновани изговори за неприфаќањето на нашиот предлог. Кон крајот на 2024 година Советот на Општина Тетово ги променил Генералниот и Деталниот урбанистички план за просторот на тетовскиот „Монопол“, но не за да предвиди парк, туку за да се овозможи изградба на станбени згради за околу 2.000 станови. Веднаш потоа државното земјиште е отуѓено, односно продадено на поединци за смешни 7.000 евра. Биљал Касами не кажува аргумент зошто мнозинството во Советот на Општината ги изменило плановите, и како тоа тој го дозволил, велат од „Тетово сака парк“.

Градоначалникот Биљал Касами изјави дека имал законска обврска да го преобликува јавниот имот во формата во која тоа и го направил. Според него, тоа е направено врз основа на правилник усвоен од претходните влади, каде што е определено дека преобликувањето на парцелите се врши со определен ценовник.

-Тоа беше процес определен многу порано, за кој Општина Тетово немаше можност да постапи поинаку. Ја имам овде одлуката за приватизација, приватизацијата е реализирана во 2014 година. Тука е индикативно, за мене е многу индикативно дека еден ваков значаен процес на продажба на државен имот е реализиран од страна на раководител на регионална единица. Приказната за Монополот е, би рекол, една од најтажните приказни за Тетово и тетовци од она што се обиде да се прикаже во јавноста. Во Тетово, како случајот со Монополот, постојат и други јавни простори, како што се случаите со Тетекс, ШИК Јелак, Монопол, Интерпромет. Овие јавни простори, врз основа на одлуките на Владата за приватизација, се продадени по симболични цени во споредба со пазарната вредност. Јас овде ги имам обезбедено сите одлуки за приватизација на овие стотици хектари земјиште во нашиот град, каде што голем дел од нив веќе се претвораат во простори за колективно станување, изјави Касами.

Од иницијативата „Тетово сака парк“ го потсетуваат Касами дека работа на градоначалникот и советниците не е грижата за приватниот капитал на градежниците и урбаната мафија, туку за јавниот и заеднички интерес на луѓето.

-Туѓите грешки од 2014 година, не се оправдување за денешните фатални грешки. Кога гласно кажувавме дека најголем дел од опфатот на предлогот е државно земјиште Општината и Касами тоа неосновано го негираа. Кога предупредувавме дека се сомневаме дека зад ваквото неприфаќање на нашиот предлог се кријат лукративни мотиви, Биљал Касами измислуваше непотребни националистички провокации. Кога предупредувавме дека е последна можност сите граѓани да добијат зелен јавен простор, наместо неколкумина да свртат милиони на грбот на јавното добро Биљал Касами и дел од советниците нѐ игнорираа и нѐ обвинуваа дека имаме други мотиви и цели, а не градење на парк, велат од Иницијативата.

Од таму имаат краен апел до советниците - пред да биде предоцна, веднаш да се суспендираат одлуките за промена на ГУП и ДУП за просторот на тетовски „Монопол“ и да се интензивира процесот на изработка на нов, современ Генерален урбанистички план за Тетово, процес кој е во тек, но се одолговлекува.