Меѓународниот кривичен суд изрази жалење за повлекувањето на Унгарија

Меѓународниот кривичен суд (МКС) денеска изрази жалење за одлуката на Унгарија да се повлече од договорот за формирање на судот, оценувајќи дека секое повлекување може да му наштети на извршувањето на правдата.

„Кога една земја-членка се повлекува од Римскиот статут (со кој е основан МКС), тоа фрла сенка на нашата заедничка потрага по правда и ја слабее нашата решителност да се бориме против неказнивоста“, се наведува во соопштението на претседателството на Собранието на земјите-членки на МКС со седиште во Хаг.

Судот е „во центарот на глобалната посветеност за утврдување одговорност“ и меѓународната заедница треба „да го поддржи без резерва“, се додава во соопштението, додавајќи дека правдата бара единство.

Ова тело на МКС се обрати и до Унгарија, наведувајќи дека секоја членка на Римскиот статут има „право да ја изрази својата загриженост пред Собранието на земјите-членки“.

„Претседателството силно ја охрабрува Унгарија да води конструктивен дијалог за ова прашање и ја повикува да остане цврсто посветена на Римскиот статут“, се додава во соопштението.

Унгарските власти денеска соопштија дека ја започнале процедурата за повлекување од МКС во моментот кога унгарскиот премиер Виктор Орбан го прими својот израелски колега Бенјамин Нетанјаху, кој се бара за наводни воени злосторства и злосторства против човештвото во Појасот Газа.