Мелони: Новите американски царини за ЕУ се грешка, но не и катастрофални
Италијанската премиерка Џорџа Мелони денеска изјави дека царините за ЕУ што денеска ги објави американскиот претседател Доналд Трамп се грешка, но дека, како што наведе, тие не се катастрофални.
Мелони за италијанската државна телевизија РАИ изјави дека влијанието на американските царини не треба да се прецени и дека одговорот на нив треба внимателно да се разгледа, пренесоа британските медиуми.
-Не смееме да поттикнуваме аларм, тоа не е катастрофа, рече Мелони, истакнувајќи дека не е убедена дека најдобриот начин да се одговори на американските закани е воведувањето реципрочни царини.
Американската администрација објави дека основната тарифа од 10 отсто за целиот увоз во САД ќе стапи на сила на 5 април, а од 9 април ќе стапат на сила и реципрочните царини за приближно 60 земји и територии кои Белата куќа ги нарече „најлоши престапници“.
Одредени земји и територии ќе се соочат со царина од само 10 проценти, а меѓу нив се Сингапур, Бразил, Австралија, Нов Зеланд, Турција, Колумбија, Аргентина, Ел Салвадор, Обединетите Арапски Емирати и Саудиска Арабија, јавува Би-Би-Си.
Од 9 април, специфичните реципрочни тарифи за приближно 60 „најлоши престапници“ ќе стапат во сила за ЕУ од 20 отсто, како и за Кина 54 отсто (кои ги вклучува и претходните царини), Виетнам 46 отсто, Тајланд 36 отсто, Јапонија 24 отсто, Камбоџа 49 отсто, Јужна Африка 30 отсто и Србија 37 отсто
