11,5 милијарди долари трговска размена на Македонија во 2016

Според податоците на Државниот завод за статистика, вкупната размена со странство во текот на минатата година изнесувала 11.544.649 илјади долари.

Од нив вредноста на извозот изнесува 4.787.199 илјади и бележи раст од 6,6 отсто во однос на претходната година, додека вредноста на увезената стока изнесува 6.757.450 илјади долари и е за 5,6 отсто повеќе од претходната година.

Трговската размена по производи покажува дека во извозот најголемо е учеството на катализаторите на носачи со благородни метали, сетовите на проводници за палење, за возила, авиони или бродови, фероникелот и облеката.

Во увозот најмногу се застапени платината и легурите на платина, необработени или во прав, нафтените масла и маслата добиени од битуменозни минерали (освен сурови), другите метали од платинската група и нивни легури, необработени или во облик на прав и електричната енергија.

Трговскиот дефицит, во периодот јануари-декември 2016 година, изнесува 1.970.251 илјади американски долари. Покриеноста на увозот со извоз, во периодот јануари-декември 2016 изнесува 70,9 отсто.

Во периодот јануари-декември 2016 година, според вкупниот обем на надворешно-трговската размена, Република Македонија најмногу тргувала со Србија, Грција, Германија, Велика Британија, и Италија.