Набавка на 1200 апарати за Тетовската болница
Министерството за здравство го започна големиот циклус за набавка на нова и најсовремена опрема за јавните здравствени установи со кои што ќе се набави опрема за над 100 јавни здравствени установи низ целата држава. Проектот е вреден 33 милиони евра.
-Министерството за здравство го објави тендерот за набавка на опрема за клиничката болница во Тетово. Тендер вреден околу 2 милиони евра со кој што ќе се набават повеќе од 1200 парчиња медицинска опрема која што треба да биде ставена во функција на сериозно подобрување на дијагностиката и квалитетот на здравствените услуги кои што се даваат во клиничката болница Тетово, истакна Министерот Тодоров на денешната прес-конференција.
Тој додаде во рамки на оваа набавка ќе бидат купени дигитален рендген апарат, пет ехо апарати, два ЕМГ апарати, педијатриски ехо апарат, ендоскопски столб, RCP, ехо апарат за кардиолошка, трансезофагијална сонда и линеарна сонда, 13 пациент монитори, како и пациент монитор со мониторинг станица, два апарата за анестезија, 16 инфузиомати, 16 перфузори и бројни апарати за физикална терапија, хируршки сетови и останати медицински материјали.
– Се работи за почеток на еден голем инвестициски циклус во здравството, во опрема. Нешто што е исклучително значајно и еден од најзначајните сегменти за развој на секој здравствен систем. Фокусот на Министерството за здравство беше и останува набавката на нова и најсовремена опрема која ќе биде ставена во функција на здравствените работници и пациенти, додаде Министерот за здравство Никола Тодоров.
