Жените заработуваат помалку од мажите

Поради ова, а по повод Меѓународниот ден на жената, денеска Конфедерацијата на слободни синдикати побара трудот да се вреднува подеднакво и да не постои полова дискриминација при вработувањето.

Генералниот секретар на КСС Зоран Антовски им порача на работодавачите при вработувањето да ги земат предвид образовните критериуми и професионалните ветшини на кандидатот, а не да се прави поделба на работите на машки и на женски.

– Македонските компании при вработувањето треба да го ценат квалитетот и да водат сметка за способноста на лицето, а не да се водат од родовата нееднаквост. За жал, околу 10 проценти се жени на менаџерски позиции, а би требало овој број да биде поголем, рече Антовски.

Даниела Јаневска од Секцијата на жени при КСС смета дека во Македонија сеуште постои родова дискриминација и стереотипи и оти тоа е она на што треба во иднина да се работи.

– Според последните објавени податоци, жените заработуваат за 12,5 проценти помалку од мажите што значи дека на годишно ниво жената 33 дена во годината е неефективно платена. Платата треба да биде резултат на трудот, независно од полот, истакна Јаневска.

Од КСС посочуваат дека многу често жените ги надминуваат мажите во секоја фаза од образованието, но оти тоа не е вреднувано на работното место.