6 години од земјотресот и цунамито во Јапонија

Јапонија денеска ја одбележува шестата годишнина од силниот земјотрес во 2011 година, кој предизвика моќно цунами во кое загинаа 15.893 лица, а 2.550 се уште се водат како исчезнати и доведе до хаварија во нуклеарната централа „Фукушима“, со чии последици земјата се уште се справува.

На 11 март 2011 североисточниот дел на Јапонија беше погоден од земјотрес со интезитет од 9 степени по Рихтеровата скала.

Епицентарот на земјотресот беше под окенаското дно западно од Јапонија и тој предизвика големи бранови со висина и до 40 метри, кои предизвикаа катастрофални последици во должина од 500 километри од брегот на островот Хоншу.

Централната комеморативна церемонија почна со минута молчење во 14.46 часот по локално време, кога и се случи земјотресот пред шест години.

На церемонијата се обрати јапонскиот премиер Шинѕо Абе, кој се заблагодари на меѓународната заедница за укажаната помош и поддршка при катастрофата „што се случува еднаш во илјада години“, нагласувајќи дека Јапонија „научила вредна лекција од ужасните последици од трагедијата“.

На собирот говореше и помладиот син на јапонскиот цар Акихито, принцот Акишино, кој изрази надеж дека сите оние што се соочија со ужасните последици од катастрофата нема да бидат заборавени и дека ќе дојде денот кога ќе можат да се вратат во своите домови и да живеат во „мир и спокојство“.