Аргентинската влада одлучи да отпушти 354 новинари и вработени во државната новинска агенција Телам од вкупно 900. Владата упати осуда заради употребата на агенцијата за политички цели во време на поранешните претседатели Нестор и Кристина Киршнер.
Германија треба да ја зголеми минималната плата следната година на 9,19 евра за час, а потоа на 9,35 евра во 2020 година, препорача комисија назначена од владата во Берлин. Со потегот се отвора пат за зголемување на личната потрошувачка во најголемата европска економија.
Судија во Калифорнија побара од американските погранични власти да спојат раздвоени имигрантски семејства во рок од 30 денови.
Против администрацијата на претседателот Доналд Трамп, тужба поднесоа 17 сојузни американски држави и дистриктот Колумбија, кои се обидуваат да ја запрат „суровата и незаконска“ политика на присилно раздвојување на имигрантските семејства, кои влегуваат од Мексико.
Прв пат по 2015 година Советот на ЕУ синоќа донесе одлуки за проширување, кои значат огромен чекор за европската перспектива на Македонија и Албанија, изјави бугарската вицепремиерка и министер за надворешни работи Екатерина Захариева.
Италјанскиот министер за внатрешни работи Матео Салвини му порача синоќа на францускиот претседател Емануел Макрон дека ако мисли оти не постои мигрантска криза, да ја отвори вратата на својата куќа за мигранти.
Каталонската регионална влада донесе одлука да се отворат одново шест од претставништвата во странство, кои беа затворени од Мадрид по референдумот за независност на Каталонија.
Потпретседателот на САД, Мајк Пенс, ги повика жителите на Централна Америка да се откажат од намерите за нелегално влегување во САД.
Главниот град на Финска, Хелсинки е можна локација за средбата на претседателот на САД и на Русија, Доналд Трамп и Владимир Путин, изјави неименуван американски висок претставник.
Во Велика Британија трет ден по ред се забележани невообичаено високи температури на воздухот, а во северна Англија регистирирани се и пожари.
