Ресторанот Форца со хуманитарна акција
Со цел да покаже социјална одговорност и да ги поттикнеме граѓаните на активност во овој правец, ресторанот „Форца“ ќе ги отвори вратите за социјално загрозените категории на граѓани и ќе обезбедуваме по еден топол оброк дневно.
- Нашето внимание ќе биде примарно свртено кон тоа овие луѓе да почувствуваат грижа за нив, секојдневно да уживаат во еден достоен топол оброк, подготвен од најдобрите готвачи во Македонија и сервиран од професионален персонал. Преку оваа наша иницијатива ги повикуваме сите заинтересирани правни субјекти и граѓани да ја поддржат оваа кампања и да дадат свој придонес во согласност со нивните можности. Ние ќе започнеме со еден оброк, но крајната цел е да обезбедиме до три оброци дневно. Сметам дека солидарноста е една од основните вредности кои сите ние треба да ги негуваме. И малите дела можат да бидат големи, а за тоа не е потребно многу, доволно е само да се има желба да се биде хуман - истакна сопственикот на ресторанот „Форца“, Игор Меновски.
На оваа иницијатива веќе активно се приклучи агенцијата за односи со јавност и комуникациски консалтинг „Вај нот комуникации“. Од агенцијата велат дека желбата да се биде општествено одговорен е најголем мотив за нив да станат дел од оваа приказна.
- Да се биде дел од еден ваков голем проект претставува посебна чест и задоволство за нас како компанија. Желбата да се помогне онаму каде што е најмногу потребно ни дава посебен мотив за максимално вклучување во целата приказна. Нашата мисија и цел, покрај општествената одговорност е да се мотивираат и останатите компании, организации и граѓани да бидат дел од оваа приказна и да помогнат според своите можности преку разни акции и кампањи кои ќе следат во иднина - изјави Марко Костадиновски, сопственик на „Вај нот комуникации“.
