Борозан и Вардар договорија нова соработка
Црногорскиот репрезентативец Вуко Борозан и во следните сезони ќе биде дел од екипата на Вардар. Левиот бек и повеќекратниот македонски првак договорија нова соработка, и тоа за следните четири сезони.
Според новиот договор Борозан треба да остане во Вардар најмалку до 2021 година. Борозан (23) дојде лани во Вардар, и во текот на сезонава се наметна како еден од подобрите играчи, постигнувајќи 41 гол во лигата на шампионите. Во СЕХА Газпром лигата постигна 48 гола на 16 натпревари. Беше избран и во најдобрата седморка на Ф4 турниорот на СЕХА лигата во Брест. Со Вардар го освои својот прв трофеј во СЕХА лигата и првпат во кариерата ќе игра на Ф4 турнирот во Келн.
„Задоволни сме што во своите редови ќе го имаме и во иднина Вуко Борозан, и неговите силни и прецизни шутеви. Тој одлично се снајде во клубот досега и очекуваме и во иднина да прикажува доби игри, и заедно да се радуваме на нови успеси, изјави Давор Стојаноски, Извршниот директор на Вардар.
Вардар е пред одбрана на шампионската титула и во Македонија, откако победи убедливо со 38-25 (20-13) на последниот меч со Металург. На овој натпревар Борозан постигна шест гола и беше меѓу тројцата најпрецизни ракометари во тимот и на средбата.
Во кариерата Борозан има играно за екипите на Ловќен, Карловац, Металург и Либек.
