Палермо пред гаснење – долг поголем од 120 милиони евра

Италијанскиот Палермо би можело да оди во стечај бидејќи обвинителството во главниот град на Сицилија отворило прелиминарна истрага поради финансиските долгови.

Палермо, за кој настапуваат двајцата македонски репрезентативци, Илија Несторовски и Александар Трајковски, сезоната во Серија А ја заврши во хаос, испадна од Лигата, си заминаа претседателот Маурицио Цампарини и спортскиот директор Никола Салерно, а сега и кредиторите поднеле жалба поради неисполнетите обврски на клубот.

„Розовите“ ги презеде Пол Бачалјини, но проблемите останаа бидејќи Палермо им должи на менаџерите и на советниците, како и на државата, повеќе од 120 милиони евра.

Локалните медиуми пишуваат дека истрагата е во тек и дека не се очекува дека брзо би можело да следува банкрот, но дека сосема е реален, посебно што приходите нема да бидат како кога се игра во Серија А.

Клубот може да се спаси со негова брза продажба, веќе се водат разговори во Лондон, а загрижува тоа што Палермо сè уште не ги исполнил условите да се натпреварува и во Серија Б.