Џулија Робертс се шета на Кнез Михајлова, ќе дојде ли во Скопје за Супер купот?

Холивудската ѕвезда Џулија Робертс пристигна во Белград, каде ќе помине неколку дена со својот сопруг Даниел Модер и со своите деца Хејзел, Финејс Волтер и Хенри Даниел, пишува весникот „Вечерње новости“.

Неофицијално, светски познатата актерка пристигнала во Белград тајно, без претходна најава. Всушност, таа го придружува својот сопруг, сценарист, оператор и режисер, кој работи на еден проект во Белград. Според договорот кој го потпишал, тој се обврзал да не дава никакви информации додека филмот не биде завршен.

Семејството престојува во хотел на Студентскиот плоштад во српската престолнина.

Во петокот и во саботата Џулија и нејзиното семејство јаделе во ресторан „Смоквица”, чии келнери во почетокот дури не ја препознале.

– Таква е како што изгледа на телевизија. Скромна, нормална и мирна. Никој не ја позна, немаше чувари, седеа во мирна семејна атмосфера. Пријатно беше да ги гледаш, велат келнерите.

Сепак, мора да се напомене дека Џулија Робертс е верен фан на Манчестер Јунајтед а пред некое време на социјалните мрежи објави фотографија каде што носи дрес на Манчестер Јунајтед со опис на фотографијата „In love with Manchester United“.

Дали ќе го искористи настапот на фудбалскиот клуб за кој навива, на супер купот во Скопје и од трибините на Телеком арената ќе им ја даде својата поддршка, останува да видиме.