Червар: Голманите и искуството беа решавачки за исходот на мечот

Тренерот на Металург Лино Червар не го криеше незадоволството од денешниот пораз од Бешикташ во рамките од 2.коло на Лигата на шампиони.

Хрватскиот стратег смета дека клуч на поразот е лошиот ден на голманите на Металург, за разлика од нивниот колега на спротивната страна, но и покрај тоа, тимот од Автокоманда беше конкурентен се до завршните петнаесетина минути.

– Нашиот голман во првиот дел не одбрани шут, додека кај нив голманот беше најдобар. Многу енергија потрошевме да останеме во игра и дојдовме до 14-14. Во вториот дел ни недостасуваше искуство. Во пресудните моменти одлучи деконцентрацијата и искуството. За првото полувреме можам да им дадам честитки, но во вториот дел испукавме во желбата, примавме лесни голови и многу се мачевме. Кога се кршеше резултатот, не знаевме да ги искористиме нашите шанси. Но, тоа е тоа, без девет играчи од лани, со нов тим, може да играме и подобро, изјави Червар по натпреварот.

И во следното 3.коло Металург ќе играна домашен терен и тоа на 30 септември кога во Скопје ќе гостува португалскиот Спортинг Лисабон.