РФМ ја исплати премијата на младинците за освоеното шесто место на СП во Алжир

Ракометната федерација на Македонија ја исплати премијата на машката младинска репрезентација, за пласманот на шестото место на Светското Првенство во Алжир 2017 година.

– По претходно донесена одлука на Управниот одбор, Ракометната федерација на Македонија ја исплати премијата од 10.000 евра на репрезентацијата и 1.000 евра премија на селекторот Иле Темелковски. Дополнително, РФМ ги реализираше и наменските средства доделени од Агенцијата за млади и спорт за награда за Младинците во вредност од еден милион денари, објавија денес од федерацијата.

Младинската машка ракометна репрезентација на Македонија, на Мундијалот што се играше во Алжир во јули 2017, го оствари најголемиот успех во историјата на македонските колективни спортови на Светските првенства, освојувајќи го шестото место.

Селекцијата беше предводена од Темелковски и оствари пет победи во вкупно деветте средби што ги одигра во периодот од 18 до 30 јули.