Завршија квалификациите, познати сите учесници на Светското првенство во Русија

Со деветте натпревари одиграни синоќа ширум Европа завршија натпреварите од континенталните квалификации за Мундијалот што следната година ќе се игра во Русија.

Португалија и Франција се последните две европски селекции што како првопласирани во своите групи изборија учество на СП.

Португалците во директен дуел за пласман ја победија Швајцарија со 2:0, додека Франција првото место во својата група го потврди со победата над Белорусија од 2:1.

Директен пласман на СП 2018 од европскиот континент обезбедија: Франција, Португалија, Германија, Србија, Полска, Англија, Шпанија, Белгија и Исланд.

Бараж ќе играат второпласираните: Швајцарија, Италија, Данска, Хрватска, Шведска, Северна Ирска, Грција и Република Ирска.

„Извиси“ Словачка како најслабо пласирана од вторите репрезентации во деветте групи.

Двојките за баражот ќе бидат одредени со ждрепка во Нион на 17 октомври.