Приштина го поздрави усвојувањето на Законот за употреба на јазиците
Официјална Приштина го поздрави усвојувањето на Законот за употреба на јазиците во македонското Собрание. Претседателот на Косово, Хашим Тачи истакна дека тоа е високо демократско постигнување за Македонија, која меѓу првите ја призна независноста на Косово.
– Унапредувањето на политичките права на Албанците во Македонија гарантира многу поголемо граѓанско и етничко единство во соседната Република. Им честитаме на албанските граѓани за ова политичко, административно и културно постигнување, напиша Тачи на својот Фејсбук профил.
Тој додава дека усвојувањето на законот е значаен чекор од Охридскиот договор кој уште повеќе ги зајакнува соживотот и европската перспектива на Македонија.
Преку Фејсбук се огласи и претседателот на косовскиот Парламент, Кадри Весели кој му честиташе на македонското Собрание и на, како што напиша, сите негови сонародници на изгласувањето на законот за албански јазик.
Според Весели ова е многу значаен чекор во исполнувањето на легитимните права на албанскиот народ во Македонија.
– Изгласувањето на овој закон претставува големо постигнување во целосната реализација на обрските од Охрдскот договор и од стадрадите барани во рамки на европската интеграција, напиша Весели на Фејсбук.
