„Три дена во септември“ добитник на наградата „Балкански мостови“

„Три дена во септември“ на режисерот на Даријан Пејовски ја доби наградата „Балкански мостови“ за најдобар филм на шестиот фестивал Balkan Florence Experience кој се одржа во Фиренца од 22-ри до 25 февруари.

Фестивалот е преглед на најдобрата и најновата продукција на документарни и долгометражни филмови од Хрватска, Србија, Босна и Херцеговина, Македонија и Албанија.

„Балкански мостови“ им се доделува на режисери на долгометражни и документарни филмови кои, пред сè, успеале да ги зајакнат човековите права во своите филмови. Одлуката да му биде доделена на Пејовски ја донесе жири составено од филмски критичари и експерти од Балканот.

„Три дена во септември“ е копродукција помеѓу Скопје филм студио и Иконе Студио од Косово, а проектот беше поддржан од Агенцијата за филм на РМ и Косовскиот кинематографски центар. Даријан Пејовски е и сценарист на филмот заедно со Игор Иванов.

Филмот на 2 март од 18 часот ќе биде прикажан во Кинотека на Македонија, каде што ќе биде присутна и дел од екипата.