Вучиќ: Најважните разговори за Косово допрва доаѓаат
Од 10 до 20 април во Европа и во светот ќе ги водам „некои од најважните разговори за прашањето на Косово“, изјави денеска српскиот претседател Александар Вучиќ.
Тој на прес-конференција по средбата со претседателот на Република Српска, Милорад Додик во Белград нагласи дека не може јавно да зборува за овие разговори, додавајќи дека од нив не очекува „премногу добри вести за Србија“.
- Ние не сме во лесна ситуација, не затоа што Владата на (српската премиерка) Ана Брнабиќ или кој било од оваа генерација е виновен. Направивме многу грешки и многу објективни околности не ни одеа во прилог, но ни останува да ја браниме својата земјата од секого, рече Вучиќ.
Тој изјави дека се согласува српските фирми да учествуваат на Меѓународниот стопански саем во Приштина, што ќе се одржи од 18 до 21 април, бидејќи „за српските фирми е важен секој пазар, а Белград во трговинската размена со Косово има годишен суфицит од 500 милиони евра“.
- Сметам дека оваа размена можеме да ја зголемиме и на милијарда евра, изјави Вучиќ, додавајќи дека српските фирми го имаат неговиот „благослов“ да одат о Приштина.
Тој најави и дека Србија ќе и донира пет милиони евра помош на Република Српска.
Српскиот претседател на прес-конференцијата ги нападна и опозициските лидери Саша Јанковиќ од Движењето на слободните граѓани (ПСГ) и Вук Јеремиќ од Народната партија, во врска со нивните ставови околу прашањето за Косово.
- Ставовите на Саша Јанковиќ и на Вук Јеремиќ за Косово суштински се исти, бидејќи тие подразбираат дека Косово е независно, а да Србија и Србите ништо не добија, изјави Вучиќ.
