Панатинаикос ја напушта Евролигата

Раздорот во односот меѓу грчкиот кошаркарски тим Панатинаикос и Евролигата го достигна својот врв. Сопственикот на „детелините“, Димитрис Јанакопулос објави дека грчкиот тим нема да продолжи со учеството во најсилниот клубски турнир на континентот, откако останатите тимови од елитниот турнир, како и раководството на Евролигата, ги отфрлиле сите негови предлози на денешната средба во Мадрид. Јанакопулос ја потврди одлуката со порака на Инстаграм. Таму милијардерот пишува: „Панатинаикос се враќа таму каде што кошарката отсекогаш била. Крај“. Кон зборовите е додадено и логото на ФИБА. Панатинаикос е шесткратен шампион на Евролигата, а во два случаи во кои се искачува на врвот, заработува „тројна круна“, дополнувајќи го триумфот во Европа со титула и Куп во Грција. Јанакопулос е на црната листа на Евролигата и порано во текот на годината доби едногодишна забрана за посета на какви и да е натпревари од турнирот. Потоа тој доби слична санкција и во грчкото првенство, а како контра удар, испрати до медиумите извештај со голем број на грешки на штета на неговиот тим и на двата фронта. Пред три години, Јанакопулос беше обвинет од турскиот судија Реџеп Анкарали за упатување смртни закани по натпреварот против ЦСКА Москва.