Хјустон поведе во серијата против Јута, Леброн со нов рекорд во плејофот

Џејмс Харден постигна 41 поен, а Хјустон ја започна со победа од 110: 96 серијата против Јута од второто коло на НБА плеjофот. „Ракетите“ ќе бидат домаќини и во натпреварот бр. 2. Играчите од Тексас доминираа од самиот почеток и немаа проблеми откако поведоа со 25 поени разлика уште на полувремето. Харден и Крис Пол го контролираа темпото, а „џезерите“ беа очигледно уморни од тешкиот меч претходно со Оклахома Сити. Во второто полувреме гостите се подобрија и намалија на 11 поени, а можеа да се доближат уште, но не успеаjа во напорите, откако Харден повторно ја направи разликата. Лидерот на Хјустон забележа 7 тројки, а целиот тим беше 17-32 во шутот од далеку, што беше премногу за ривалот. Донован Мичел и Џеј Краудер постигнаа 21 поен за Јута, кои се надеваат дека ќе можат да одговорат во натпреварот бр. 2. Во седмиот плеј-оф натпревар меѓу Кливленд и Индијана, Кавалирс стигнаа до победа од 105:101. Финалистите од минатата сезона ја освоија серијата со 4-3 и продолжија во вториот круг, очекувајќи го во полуфиналето на конференцијата број еден тимот од регуларната сезона на Истокот – Торонто Репторс. Лидерот на тимот, Леброн Џејмс одигра еден од најсилните натпревари во плејофот и заврши со 45 поени, 9 скокови, 7 асистенции и 4 украдени топки. Супер ѕвездата на домаќините веќе е бр. 1 во историјата на НБА по последниот показател, откако го надмина шесткратниот шампион со Чикаго Булс – Скоти Пипен. Виктор Оладипо повторно беше најдобар во Индијана и заврши со 30 поени, 12 скокови и 6 асистенции. Дарен Колинс додаде 23 поени, додека Тадиус Јанг 14.