Столе: Ако играме добро, нема ништо да зависи од противниците

За разлика од другите години сега немаше многу врева и мешаница на дружењето со новинарите во Келн. Нема ниту една германска екипа, нема многу интерес од локалните медиуми, а фактот што има дури три екипи од Франција го намалува и бројот на медиуми што се заинтересирани за ф4 турнирот. Без разлика на сѐ, најголемиот клупски спектакл во Европа останува најпосетуваниот настан, и Лаксес арената е одамна распродадена.

Пред полуфиналните натпевари, секој тим имаше по 30 минути да биде на располагање на новинарите. Покрај англискиот и француски јазик, најчесто поставувани прашања имаше и на српско-хрватски и македонски јазик. Сите сакаат да ги прашаат ракометарите на Вардар за нивните очекувања и размислувања во пресрет на полуфиналните натпревари.

Вардар веќе имаше два тренинга во Келн. Може да почне лудилото наречено Ф4.

– Минатата година беше поинаку, бевме првпат тука, а сега ја имаме таа шампионска тежина со нас. Мислам дека сме способни да се носиме со неа. Наше е да изиграме како што знаеме и да се обидеме повторно да освоиме. Штом си пласиран овде, значи нешто вредиш. Не е важно како си стигнал таму.

– Монпелје има страшна екипа, играат брз агресивен ракомет, стабилен тренер кој со години е таму и мислам дека им се склопи сето тоа за да дојдат овде оваа година. Меѓутоа повторно ќе речам, ако ние сме оние вистинските, нема да зависи ништо од нив, вели капитенот Стоилов.