Почнаа подготовките за македонската кошаркарска репрезентација
Македонската кошаркарска репрезентација денеска го имаше првиот собир во пресрет на последниот натпревар во рамки на првата фаза од претквалификацискиот циклус за Евробаскет 2021.
На повикот на селекторот не одговорија тројца повикани кошаркари поради повреда, а Александар Костоски подоцна ќе им се приклучи на подготовките.
Меѓу присутните беше и македонскиот натурализиран кошаркар Шејн Витингтон кој ќе ја пополни празнината во рекетот на местото на Ричард Хендрикс.
- Имав малку време да се запознам со тимот. Возбуден сум што сум во Македонија. Со нетрпение го чекам новиот предизвик и првиот натпревар, се надевам дека ова ќе биде едно убаво искуство. Сите сме професионалци, се надевам дека ќе се екипираме добро. Македонија изгледа добро, се надевам дека ќе се вклопам во тимот. Ја разгледував и македонската кошарка во изминатиот период, Кајл Курич, со кого играв во минатото ми кажа нешто за неа. Ми кажа дека е добра и натпреварувачка и возбуден сум што сум дел од неа, изјави новиот „американски“ Македонец.
Македонија во последниот натпревар во оваа прва фаза на 28 јуни, на гостински терен игра со Швајцарија.
