Хрватите ги „зезнаа“ сите кои го уплатија Мажиќ

Хрватска во вчерашното полуфинале ја победи репрезентацијата на Англија со 2:1 и обезбеди пласман во финалето на Мундијалот во Русија.

Во недела на стадионот Лужники во Москва, Хрватска и Франција ќе го одиграат натпреварот по кој ќе биде познат светскиот шампион во фудбал.

Освен Англија, Хрватска го елиминираше и Милорад Мажиќ кој се кандидираше да ја дели правдата во финалето. Српскиот судија пред и во текот на Светското првенство во Русија беше во најтесниот круг за избор на судија за судење на финалето.

Сепак, ФИФА за финалето нема да го делегира Мажиќ. Правилата се јасни, судењето е забрането за судија кој доаѓа од исто говорно подрачје како и една од земјите кои се нашле во завршницата.

Сепак, Милорад со останатиот дел од српскиот судиски тим ќе конкурира за судење на натпреварот Белгија-Англија за трето место.

Се шпекулира дека финалето Франција-Хрватска би можело да припадне на Иранец Алиреза Фагханиј, Бразилецот Сандро Ричи или Аргентинецот Нестор Питана.