Гугл Хром ќе предупредува при отворање интернет страница со стар http линк

Новата верзија на пребарувачот Гугл Хром ќе содржи опција за предупредување за интернет страници кои ја користат старата ХТТП (http) врска, наместо посигурната, нова ХТТПС (https).

ХТТПС линкот е криптиран и, макар што не е 100 отсто сигурен, е далеку подобра заштита од ХТТП. Тој, пред се, штити од следење на контактот меѓу корисникот и страницата, копирање пораки, несакано појавување на реклами, „копање" криптовалути... Уште пред неколку месеци Гугл најави дека ХТТП ќе се претвори во елемент што Хром ќе го препознава како проблем на одредена страница.

Така, кога ќе посетиме линк што има само ХТТП, ќе добиеме предупредување дека тој не е доволно сигурен.

Според официјални податоци, веќе 83 од стоте најпопуларни интернет страници во светот имат ХТТПС, а 76 отсто од интернет сообраќајот преку Хром за Андроид е заштитен.