Погба: Со таков пристап нема резултат

Играчот од средниот ред на Манчестер Јунајтед, Пол Погба, беше самокритичен по неочекуваниот пораз од Брајтон во 2.коло од Премиер лигата.

Манчестер вчера загуби, но тоа што ги загрижува навивачите на тимот од „Олд Трафорд“ се играта на нивните миленици и трите примени гола.

- Сите во тимот сме свесни дека со таков пристап не може да се дојде до целта. Почнувам прво од себе, а потоа тоа важи и за другите. Не се залагавме доволно. Во иднина мора да дадеме повеќе, да се бориме, да се трудиме, рече Французинот.

Погба се осврна и на грешките што се повторуваат.

- Направивме некои грешки кои никако не смеевме да ги направиме. Сепак, верувам дека оваа сериозна лекција ја научивме. Одиме понатаму и верувам дека ќе бидеме подобри на следните натпревари.

Манчестер Јунајтед во првото коло го победи Лестер потешко од очекувањата (2:1), по што следуваше поразот од Брајтон (2:3).

Во следното коло, на 27 август Јунајтед е домаќин на Тотенхем.