Либерман рамнодушен за моделот на две држави

Израелскиот министер за одбрана Авигдор Либерман изјави дека не го интересира палестинската држава.

Неговата изјава уследи откако претседателот на САД, Доналд Трамп истакна дека го поддржува моделот на две држави за решавање на израелско-палестинскиот судир.

- Интересот на Израел е само безбедна израелска држава. Се друго помалу не интересира, посочи Либерман.

Трамп за време на вчерашната средба со израелскиот премиер Бенјамин Нетанјаху, на маргините на Генералното собрание на Обединети нации, изјави дека сака решение што предвидува две држави за израелско-палестинскиот судир. Тој наведе дека сака во следните два до три месеци да претстави мировен план.

- Ми се допаѓа решението за две држави. Мислам дека тоа е нешто што најдобро би функционирало... Тоа е моето чувство, посочи Трамп.

Тоа е најјасна поддршка од американската администрација за решавање на израелско-палестинското прашање.

Претходно, администрацијата на Трамп тврдеше дека ќе поддржи такво решение доколку со тоа се согласат двете страни.

Нетанјаху наведе дека каква било идна палестинска држава мора да биде демилитаризирана и мора да го признае Израел како држава на еврејскиот народ. Но, таквите услови за Палестинците се показател оти Израел не е искрено посветен на мирот.