Ковач: Нема да го менувам системот, ни треба малку среќа

Тренерот на Баерн Минхен, Нико Ковач, како причина за кризата во трофејниот клуб ги посочува отсуството на среќа поради што многуте шанси останале нереализирани, како и грешките во одбраната.

Ковач, и покрај гласините во германските медиуми за негов отказ, ја доби довербата на раководството на Баерн и нагласи дека во следните неколку натпревари не планира значајни промени во играта на тимот.

– Кога работите не одат не треба да се прават радикални промени. Тоа не носи успех и затоа треба да се остане доследен на својот систем, истакна Ковач.

Според него лошата реализација е најголем проблем за тимот, бидејќи иако имаа многу шанси фудбалерите на Баерн на последните четири натпревари не можеа да стигнат до победа.

– Топката не оди таму каде што сакаме, односно во голот. Потребно ни е малку среќа и поради тоа нема да го менуваме целиот систем, наведе тренерот на Баерн.

За Ковач вториот значаен проблем за неуспехот е неконзистентната одбрана и во таа насока истакна дека ќе бидат направени некои измени пред следниот натпревар.

Баерн утре ќе се соочи со Волфсбург во рамките на Бундес лигата.