ајФиксит го демонтира Хуавеи Мејт 20 Про

Засега Хуавеи Мејт 20 Про нема да се продава официјално во САД, но тоа не го спречи популарниот сајт ајФиксит да „ѕирне“ што има под неговите стаклени панели.

Смартфонот, кој е меѓу најимпресивните модели за оваа година со комбинацијата на куп интересни технологии, добива оценка 4/10 во однос на можноста за самостојна поправка од страна на корисниците.

Ова е помалку од 6/10 проценката за ајФон ИксЕс и ЕксАр Макс, кои обезбедуваат малку полесен пристап до „скриеното во школката“.

ајФиксит наведува дека многу од компонентите на Мејт 20 Про се модуларни и можат да се заменуваат независно, а замената на батеријата бара само симнување на задниот капак и средната рамка која содржи намотки за безжично полнење, антената за НФЦ и ЛЕД блицот.

Изградбата користи само стандардни завртки од Филипс и просечна количина лепак. Веб-страницата вели дека поради конструкцијата од типот „сендвич“ околу матичната плоча се користат пофлексибилни конектори и поправка на телефонот трае подолго.

Меѓу недостатоците се залепени предни и задни панели, што го зголемува ризикот од кршење и го отежнува почетокот на поправката.

Заедно со тоа, замена на екранот бара сериозно расклопување на телефонот и „борба“ со употребеното лепило, а освен тоа, кршење на екранот веројатно ќе доведе и до замена на сензорот за отпечатоци кој е вграден во него. Сензорот е произведен од „Гудикс“ и е оптички, што значи дека ја користи светлината на панелот за осветлување на прстот и правење на снимка.

Од ајФиксит посочуваат дека Уан Плус 6T го користи истиот сензор.