Дигиталниот живот во „темната мрежа“ чини евтино

Специјалисти за кибер-безбедност ги објавија трошоците за дигиталниот живот во т.н. „темна мрежа“ (Dark Web), врз основа на предлози од хакери за купување на кориснички профили.

Според анализа на Лабораторијата Касперски, човечкиот дигитален живот во темниот дел на мрежата чини под 50 долари, дури и ако корисникот има многу профили и е активен на Интернет.

Хакери нудат компромитирани профили по екстремно ниски цени. Фејсбук профил, на пример, се продава „на црно“ само за 1 долар, додека цената за пристап до крадена услуга за „ИксБокс“ или „ПСН“ е 5 долари, на колку се проценува и профил на „Нетфликс“.

При зделки на големо, хакерите прават отстапки и даваат гаранции – на пример, ако клиентот загуби пристап до услугата, добива бесплатно нов пробиен профил.

Најчесто хакерите ги пробиваат профилите на своите жртви преку „фишинг“ напади, несигурни мобилни апликации или преку селекција на лозинки, бидејќи повеќето корисници ги користат стандардните комбинации од типот „12345678“.

Затоа експертите по безбедност препорачуваат на корисниците да користат сложени лозинки, како и програми за анти-вирусна заштита, ако не сакаат да станат лесен плен на хакерите.