Коѕијас: Во грчкиот парламент постои мнозинство и за Договорот од Преспа и за една поинаква влада
Поранешниот министер за надворешни работи на Грција, Никос Коѕијас во интервју за грчкото радио „Њуз247“ рече дека во грчкиот парламент оостои мнозинство и за ратификација на Договорот од Преспа, но и мнозинство за една поинаква влада, јави дописничката на МИА од Атина.
Прашан за неформалниот договор меѓу коалиционите партнери во грчката влада Ципрас и Каменос, во март, одново да разговараат за ратификацијата на Договорот од Преспа во грчкиот парламент, Коѕијас рече дека роковите се одредени во самиот договор кој предвидува дека веднаш по трите процедури во Македонија, односно како што објасни, „гласањето за договорот во собранието, кое што е направено, референдумот, што е завршен и промени во Уставот, кои што се направени, дека веднаш потоа во временски период од 2-3 дена треба да дојде во грчкиот парламент“.
-Грчкиот парламент ако сака може да го помине за 1 седмица, односно да го однесе на комисиите, а потоа на пленарна седница, рече Коѕијас.
Тој оцени дека веројатно е до крајот на декември или до средината на јануари кај нас да се заврши процесот на уставни промени и истакна дека за Грција би било лошо доколку не ги почитува предвидените рокови.
-Треба да ве потсетам дека владата на ПЈРМ има направено многу работи, тешки работи за да го задржи временскиот рок на Договорот од Преспа. Би било лошо за нашата земја да го прекрши временскиот рок поради било која внатрешна причина. Не би било добра слика за нас на меѓународно ниво, рече Коѕијас.
Во однос на изјавите како од грчкиот претседател Прокопис Павлопулос, така и од заменик министерката за цивилна заштита Катерина Папакоста која побара да се достави толкувачка изјава во однос на јазикот и државјанството, Никос Коѕијас вели дека „во меѓународните договори нема такви работи“.
-Во Грција сите сакаат да водат надворешна политика, бидејќи мислат дека е лесно. Госпоѓата Папакоста и таа зема да води надворешна политика, рече Коѕијас.
Поранешниот министер за надворешни работи на Грција во интервјуто за грчкото радио истракна дека „постојат 4 работи од правна природа кои што се поврзуваат со Договорот од Преспа“ и имале една заедничка цел, „со закани и уцени да го спречат создавањето и ратификувањето на Договорот од Преспа“.
Слоганите на протестите против договорот, натписите во медиумите околу тајните фондови, заканувачките писма и пратки до него и конкурсот за фирма што ќе издава визи се работите кои ги спомена Коѕијас.
-Во протестите постоеа одредени групи кои што извикуваа слогани што се спротивно на меѓународниот закон, спротивно на добрите односи со нашите соседи, спротивно на Времената спогодба, ја прекршуваа Времената спогодба и спротивно на правната коректност. Тоа се оние кои што и во Солун и во Атина извикуваа „дајте ни оружје да влеземе во Скопје“ и јас прашувам: не требаше за ова, некој обвинител да побара објаснување?, рече Коѕијас.
Како втор пример ги спомена натписите во медиумите околу тајните фондови и информациите дека биле дадени пари во Албанија и Македонија „за да се брани Договорот од Преспа“.
-Прво, ова не е точно, второ и да е точно ѝ прави лошо на земјата, нѐ покажува како да имаме нелегални активности во трети земји. За среќа никој не ме обвини дека сум купил новинари, рече Коѕијас и додаде дека последица на ова било, „секој што во Албанија или во ПЈРМ говори позитивно за Грција да се смета дека е човек што зел пари“.
Поранешниот шеф на грчката дипломатија ги спомена и заканувачките писма и куршуми испратени до него. Како што самиот откри му биле испратени ќеси со крв, за кои му велеле дека тоа е крвта на неговата внука и на неговата ќерка, „земја полна со крв, земја полна со куршуми и експлозиви, 300 писма и заканувачки телефонски повици“.
Според Коѕијас, сите овие работи, кои што се поднесени до обвинителството во неговата тужба,се поврзуваат со Договорот од Преспа.
Во речиси 90-минутното интервју за радиот „Њуз 247“, како што јави дописничката на МИА од Атина, поранешниот шеф на грчката дипломатија рече дека во грчкиот парламент ќе достави предлог закон за контрола на „тајните фондови“ како што е случај со оние од Министерството за надворешни работи. Тој истакна дека тајни фондови нема потреба да постојат за одредени министерства, а како на пример го спомена Министерството за Македонија и Тракија.
