Симпозиум „Патувачки театар“ на фестивалот „Театар во куфер“

Во рамки на Меѓународниот театарски фестивал „Театар во куфер“, денеска во Дом на млади во Штип се одржа симпозиум на тема „Патувачки театар“ – придружен настан покрај шесте претстави на програмата на фестивалот.

Театрологот Ристо Стефановски рече дека патувачки театар во Македонија имало уште за време на Османлиите, а најактивни биле групите кон крајот на 19-тиот и почетокот на 20 век. Според неговите истражувања, прв директор на патувачки театар во земјава е Димче Трајковски-Скопјанчето, а во неговата група имало штипјани и познатиот актер Петре Прличко.

-Патувачки театар имало уште во турско време и овде во Штип гостувале Ерменецот Балбанов со своја екипа, но тие биле со птици и животни. Во Скопје во турско време имало и посебна зграда. Главно, патувачкиот театар во Македонија почнува со Димче Трајковски и Петре Прличко, рече Стефановски.

На симпозиумот присисуствуваа и студентите од Филолошкиот факултет од штипскиот универзитет „Гоце Делчев“, а за патувачките театри говореа и Христо Петревски, Гоце Ристов, Трајче Кацаров и Кристина Костова.