Фестивалот „Музика од Светот“ завршува со „Фламенко Екос“ од Куба

Со концерт на кубанската група „Фламенко Екос“, вечерва во Битола завршува 10. јубилејно издание на Меѓународниот фестивал „Музика од Светот“.

„Фламенко Екос“ се искусна група танчери и музичари, посветени на уметничката продукција, проучување и промоција на фламенго уметноста.

Од Центарот за култура во Битола, кој е домаќин и организатор на фестивалот, информираат дека гостите од Куба учествувале на бројни фестивали во светот како што се „Трагите на Шпанија“, Интернационалниот танц-фестивал на Стара Хавана, Иберо-американскиот празник за култура, а имале и меѓународни презентации во Абу Даби, Арапските Емирати и Кувајт.

Кубанската група „Фламенко Екос“ ја водат Ана Роса Менесес, прва балерина и кореограф, и Мигуел Чавез-музичар кои го пренесуваат шпанскиот и кубанскиот музички и културен свет, вградувајќи јоруба, кантри музика и танцови елементи од популарната музика на Куба и различни жанрови на фламенко.

Фестивалот „Музика од Светот“ е поддржан од Министерството за култура.